నేనూ  వరూధిని 

ఇప్పుడే విచ్చుకుని రసాన్ని 

గుమ్మరించినట్టు 

ఎక్కడ నుంచో

వెయ్యి స్వీట్ల తియ్యదనం

గుప్పుమంటుంది

నాకేదో అనుమానమోస్తుంది

నేనేమి

పర్వతాల్లో

లేను కదా

ఇక్కడ పెద్దన కూతురు 

వరూధిని కూడ లేదు కదా

ఏమో మరి 

ఎండాకాలంలో కాళ్ళు

చుయ్ చుయ్ అంటుంటే

కాళ్లకు పసరు రుద్దుకున్నానేమోననే

విశాల సందేహం 

ప్రవరుణ్ణి చేస్తుంది

మీరు తప్పుపట్టకండి

మెదడేమి తుప్పు పట్టలేదు

నేనసలు పెద్దనకు అల్లున్నే కాదు

కాకపోతే ప్రవరుడికి మాత్రం తమ్ముడ్నే

నేను వరూధిన్నసలు 

అనుమానించలేదే

ఇనుప కచ్చడాలు కట్టుకోమని 

చెప్పనూలేదే

ఇంకోసారి నా నోట

ఆ మాట చెప్పించకు

అల్లసాని పెద్దన ముద్దుల 

వరమైన వరూధిని వేశ్యయని

నన్ను బద్నాం చెయ్యకండి

ఎవ్వరూ తిట్టకండి

వరూధిని వలచొస్తే

వయ్యారంగా లగ్గమాడుతా

ఎందుకంటే నేను గురజాడ

గిరీశాన్ని మరి

అంతకంటే ముందు

ఏమి చేతకాని 

ఆ ప్రవర గాన్ని 

గాళ్లేగరేసి కాల్తో

తంతా

ఇగ వాన్నొదిలేయ్

వరూ...

వట్టి చవటగాడు

కట్టుకున్న కచ్చడాలిప్పేయిక

ఆ దీపం వేడికి

చీకటి ఏడుస్తుంది

ఆర్పేయ్

అబ్బ ఇప్పుడాంధ్రకవితా

పితామహుడు 

కట్నమియ్యకున్నా ఫర్వాలేదు

           

          16.04.2020