బాధపడ్డ గర్భిణి

ప్రకృతి నాకో 

ఇల్లును నిర్మించింది

పద్నాలుగవ ప్రాయంలో

దిష్టి తగలకుండా 

రెండు గుమ్మడి కాయల్లా

చనులను నా ఎదుటిపై

కట్టింది

నాలోకి వచ్చిపోయే 

వారికే రోగం రాకుండా

పాదాలకు పారాణి పూసింది

నాల్గు వసంతాలప్పుడే 

నన్ను ఆకుపచ్చగా చేసింది

పచ్చి బాలింతనయ్యే

సమయమొచ్చిందని

ఋతువును మానుకొమ్మంది

ఎవడో వచ్చి నా పచ్చందనాన్ని

ఎంగిలి చేయ చూశాడు

ఏమి లేకుండా నన్ను

నమిలేశాడు

నా మెడలో తాళి కట్టి

హక్కుని పొందాడు

అడగనియ్యకుండా 

ఆస్తి చేసుకున్నాడు

పెళ్లి ముసుగులో కట్న

వ్యాపారం చేస్తున్నాడు

అడిగినంత డబ్బు తేలేదని

చర్మాన్ని బొబ్బలు పెట్టాడు

ఉదయం నిద్రలేవక మునుపే

నాలాంటి వనితలెందరో

స్టేషన్ మెట్లెక్కారు

కష్టాల్ని తీర్చమంటూ

కన్నీటితో

ఖాకీలను వేడుకున్నారు